Младинскиот културен центар – Битола во соработка со Локалниот економско-социјален совет на Општина Битола (ЛЕСС Битола), денес организираше работилница на тема „Планирање на праведната транзиција на Пелагонискиот регион“. На настанот учествуваа претставници од ЛЕСС на општините Битола, Ресен и Демир Хисар, како и други локални актери вклучени во процесите на одржлив развој и енергетска транзиција.
Целта на работилницата беше да се зајакне регионалната соработка и капацитетот на локалните економско – социјални совети во процесите на донесување одлуки поврзани со праведната транзиција – процес кој обезбедува премин кон одржливи извори на енергија без да се занемарат социјалните и економските аспекти на заедницата.
На настанот се обратија Мери Нашоку од МКЦ Битола и Борче Димитровски, секретар на Општина Битола и заменик-претседавач на ЛЕСС Битола, кои ја истакнаа важноста од вклучување на локалната заедница во креирањето на иднината на регионот.
Претставнички од граѓанската организација Еко-свест, Елена Николовска и Марија Штерјова, ги презентираа состојбите и можностите поврзани со процесот на праведна транзиција, како и потенцијалите за развој на обновливи извори на енергија во Битолскиот регион.
Работилницата се одржа во рамките на проектот „Унапредување на социјалниот дијалог во заедницата“, со поддршка од Меѓународниот центар Олоф Палме од Шведска, и претставува прв во низата настани посветени на оваа значајна тема за иднината на Пелагонија.
Во своето излагање на тема „Преглед на процесот на праведна транзиција во земјата и улогата на ЛЕСС“, Елена Николовска од организацијата Еко-свест даде јасен преглед на националниот контекст и напредокот на државата во процесот на праведна транзиција, особено во насока на напуштање на јагленот како примарен енергетски извор. Таа истакна дека праведната транзиција претставува сложен, но неопходен процес кој бара вклучување на сите засегнати страни – институции, граѓани, работници и граѓански организации – со цел да се обезбеди одржлив и фер премин кон зелена економија. Посебен акцент беше ставен на улогата на Локалните економско-социјални совети (ЛЕСС), кои имаат клучна функција во градењето на политики и иницијативи што одговараат на специфичните потреби на локалните заедници, со што се овозможува поинклузивен и поодржлив пристап во креирањето на транзициските мерки.
Марија Штерјова од Еко-свест ја претстави долгорочната визија за развој на Битола како зелен и енергетски одржлив град. Таа нагласи дека Пелагонискиот регион, со своите природни ресурси и географска положба, има значителен потенцијал за развој на обновливи извори на енергија, особено во делот на соларната и еолската енергија. Притоа, беше потенцирано дека процесот на транзиција кон чиста енергија не само што придонесува за намалување на загадувањето и климатските промени, туку и отвара нови можности за локален економски развој, иновации и отворање на зелени работни места. Штерјова повика на стратегиско планирање, вклучување на заедницата и меѓусекторска соработка како клучни предуслови за успешна енергетска трансформација на регионот.
На крај се разви дискусија меѓу присутните модерирана од Елена Николовска од Еко-свест. Учесниците активно се вклучија во размена на мислења, искуства и предлози поврзани со процесот на праведна транзиција во Пелагонискиот регион. Дискусијата се фокусираше на клучните предизвици со кои се соочуваат локалните заедници, како што се недоволната информираност, потребата од подобра координација меѓу општините и недостатокот на конкретни планови за искористување на обновливите извори на енергија. Присутните истакнаа дека е неопходно поголемо учество на граѓаните и локалниот бизнис сектор во процесот, како и зголемена улога на ЛЕСС во креирањето на локални политики. Сесијата заврши со констатација дека само преку отворен дијалог и соработка меѓу сите засегнати страни, процесот на праведна транзиција може да биде навистина инклузивен и ефективен, а за таа цел беше донесен заклучок за утврдување на акциски точки за следниот период – ЛЕСС овите од регионит да бидат одлучувачко тело за предлагање на проекти за праведна транзиција во регионот преку искористување средства од Европските фондови.
