Училниците во ОУ „Елпида Караманди“, за прв пат од 40 годишното постоење на училиштето, добиваат нова дограма, која во голема мерка ќе ја зголеми енергетската ефикасност и заштедата на електрична енергија.

Градоначалничката на Општина Битола Наташа Петровска го посети училиштето, каде што од страна на директорката Татјана Дамчевска и училишното раководство, беше информирана за текот на работните активности.

Веќе во околу 50% од училишните простории е поставена новата дограма, чија реализација беше спроведена од страна на Општина Битола, општинските јавни претпријатија и преку Проектот на УСАИД за меѓуетничка интеграција на младите во образованието, во вредност од околу 2,5 милиони денари.

До  крајот на оваа учебна година, во сите училници и работни простории ќе биде комплетно променета преостанатата дограма преку проект од МОН. На овој начин и ОУ „Елпида Караманди“ се вбројува во училиштата со реалирани проекти во насока на зголемување на енергетската ефикасност, а се очекува веќе во следната сезона, да се добијат и првите видливи заштеди на енергија.