На 18 септември во Центарот за култура во Битола, свечено беше отворено 36-тото издание на ИФФК „Браќа Манаки“. Оваа година фестивалот се оддржува под мотото „Филмот е убав“, а претседателот на Република Македонија д-р Ѓорѓе Иванов го прогласи фестивалот за отворен. Министерката за култура д-р Елизабета Канческа-Милевска и градоначалникот на општина Битола д-р Владимир Талески им ги доделија специјалните награди „ Златна камера 300 “, на познатите актери Бруно Ганц и Алексеј Серебрјаков за особен придонес во филмската уметност. Наградата за животно дело му беше врачена на кинематограферот Ришард Ленчевски, а наградата „Голема ѕвезда на македонскиот филм“ му беше врачена во отсуство на карикатуристот, автор на анимирани филмови Дарко Марковиќ од страна на Друштвото на филмски професионалци. На отворањето на фестивалот премиерно беше прикажан филмот „Лазар“ на режисерот Светозар Ристовски. Во наредните десет денови од фестивалот ќе бидат прикажани 215 филма. Од нив половина се во различни категории, од кои три натпреварувачки (Официјална, Нов европски филм и SEE Камера), а останатите 111 се студентски филмови.