Поетска магија во културниот центар Магаза. Пишаниот збор – вистинска свежина на жешката летна квечерина, исполнета со многу љубов, воздишки и сеќавања, соништа, мечти и желби преточени низ пишаниот збор, а претставени на деветтиот по ред поетски фестивал „Поетски синтези“, кој традиционално го организира здружението за наука и култура „НОВА“. На првата фестивалска вечер настапија 15 автори од нашата земја, како и од: Бугарија, Хрватска, Србија и од други земји. Тие се и автори во поетскиот Зборник „ПОЕТСКИ ПОРАКИ ЗА МИР“ во кој ќе бидат објавени песни на 50-тина поети. На овој начин поетите го даваат својот уметнички придонес како заложба за мир во светот. Во рамки на поетскиот митинг настапуваа: Вања Ангелова, Бошко Ангелов, Валериј Петров и Албена Декова од Бугарија, Искра Пенева од Србија, Љерка Тот- Наумова од Хрватска, Кристина Николовска од Скопје, Раде Силјан од Скопје, Стојан Тарапуза Скопје, Мирјана Стојановска од Битола, Никола Илијовски од Битола, Весна Мундишевска од Битола, Олга Панкина од Русија, Живко Поповски-Цветин од Скопје, Бобан Богатиновски од Куманово, Ленче Милошевска од Скопје, како и Петко Шипинкаровски од Струга, Милица Радевска од Битола и Ивана Боцевска од Скопје. Жирито, составено од д-р Валентина Гулевска и д-р Димитар Пандев и претставник од публиката, традиционално и годинава ја додели наградата „Поетска Муза“ за најдобра уметничка композиција на песна и интерпретација. Исто така, беа доделени и награди после пролетниот конкурс за најдобра книга, поезија и проза, како и книги од авторите – гости  на публиката по случаен избор.