БИТОЛЧАНЕЦ СО СРЕБРЕН МЕДАЛ ОД СВЕТСКО ПРВЕНСТВО

БИТОЛЧАНЕЦ СО СРЕБРЕН МЕДАЛ ОД СВЕТСКО ПРВЕНСТВО

Машката кугларска репрезентација на Македонија освои сребрен медал на Светското првенство кое се одржува во Унгарија. За прв пат во еден машки репрезентативен сениорски состав настапи и битолчанецот Александар Соколовски, кој денеска оствари средба со градоначалникот Талески.
Градоначалникот на Битола на Соколовски му врачи признание за успехот, слика од стара Битола и симоболот на заштитникот на градот Свети Нектариј Битолски.
„Успехот е резултат на луѓе што имаат голема желба, ентузијазам и со љубов го сакаат својот спорт. Ова е доказ дека врвен резултат може да се постигне и во скромни услови за работа. Младиот Александар Соколовски освои светско сребро, а свежи се сеќавањата и за златната олимпијка Оливера Наковска Бикова. Горд сум на врвните спортисти од Битола и ќе продолжиме со нашата реална поддршка за тоа што го прават, изјави градоначалникот Талески.
Александар Соколовски со куглање започна во кугларскиот клуб „Пелистер“, а денес е член во клубот „Макпетрол“ во Скопје.
„Како дете и младинец сум освоил два светски медали, а ова е првото сребро на светско сениорско првенство. Се радувам што сум член на репрезентацијата која прв пат освојува ваков медал и верувам дека наскоро ќе освоиме злато, изјави Соколовски.