СРЕДБА НА ГРАДОНАЧАЛНИКОТ ТАЛЕСКИ СО АМБАСАДОРОТ НА ХРВАТСКА

СРЕДБА НА ГРАДОНАЧАЛНИКОТ ТАЛЕСКИ СО АМБАСАДОРОТ НА ХРВАТСКА

 

Градоначалникот Талески оствари средба со Хрватскиот амбасадор Златко Крамариќ кој во рамки на престојот во Битола одржа и трибина посветена на влезот на Хрватска во Европската унија.
Амбасадорот Крамариќ истакна дека влезот на Хрватска во Европската унија е значаен за неговата држава, но и за државите од Западен Балкан, посебно за Република Македонија.
 
„Со влезот во Европската унија, Република Хрватска ќе биде продолжена рака на Брисел која низ партнерски односи ќе и помага на Република Македонија во процесот на евроинтеграциите. Со оглед дека меѓу двете држави нема отворени политички прашања, непречено можеме да се посветиме на стопанските, научните и културните врски и соработка. Со влезот на Хрватска во ЕУ, Македонија добива пријател и глас повеќе во процесот за добивање датум за преговори и во таа смисла може да порачам дека дијалогот е секогаш подобар облик на комуницирање од монологот“, рече Крамариќ.
Градоначалникот Талески, нагласи дека влезот на Хрватска во ЕУ значи и голема поддршка за Република Македонија.
„Јас сум убеден дека нашите пријатели од Хрватска ќе дадат голема поддршка. Честитки за влезот во ЕУ, се надеваме дека и Македонија наскоро ќе се придружи“, изјави м-р Владимир Талески, Градоначалник на Битола.