Изминатата ноќ во Битола родени се 10 новороденчиња. Од нив првите три се машки и родени се во Клиничката болница во Битола, каде што се родени и 5 девојчиња до 12 часот на првиот ден од Новата година. Две родилки се од Демир Хисар, а останатите се од Битола.
„Во текот на минатата ноќ во Клиничката болница беа примени 8 родилки и сите се породија. Имаме 6 спонтани раѓања и два царски реза. Оваа ќе ни биде машка година. Првите три дечиња беа машки и родени се: првото во 12.03 минути од мајка Александра – прворотка – 3600 грама, второто се породи некоја секунда подоцна – мајка Мира – второротка – 3650 и третото се породи во 12.05 – 3050 грама и последното во првиот час беше во 12.30 – женско бебе – мајка Ивана – второротка. Двата царски реза беа првиот во 1.25 – прворотка, а вториот утрово околу седум часот мајка -второротка. Сите се во добра сосотојба, изјави д-р Билјана Талевска.
Директорот на Клиничката болница од Битола, честитајќи ја Новата година најави дека се очекува и првата двојка од извршената инсеминација:
„Тоа е метода започната минатата година, а во текот на овој или следниот месец се очекува и раѓањето на првата двојка“, изјави Василе Најдовски, директор на Клиничка болница Битола.
Новогодишната ноќ во болницата „Плодност“ помина со две новородени деца – машко и женско, едното од Битола, а другото од Прилеп. И родилките и новороденчињата се во добра состојба. Во оваа приватна болница во 2013 година родени се вкупно 250 новороденчиња.
„Се радувам затоа што оваа бројка на 10 новородени деца е навистина голема. Убеден сум дека овие деца идниот период ќе добијат подобри услови за живеење и ќе останат во нашиот град. Се трудиме максимално да ги подобриме условите за живеење, а со тоа и условите во здравството, образованието, стопанството, економијата, животната средина, итн. Со подобрувањето на условите ќе се склучуваат повеќе бракови и ќе има повеќе раѓања. Посакуваме како на први јануари да се исполнети сите 365 дена во 2014 година – да има што повеќе дечиња и што повеќе среќни родители“, изјави Градоначалникот на Општина Битола, д-р Владимир Талески.
Традиционално Градоначалникот на општина Битола на сите новороденчиња им подари по 10 000 денари.
![](https://www.bitola.gov.mk/wp-content/uploads/2015/05/prvo_bebe_14_1-100x66.jpg)