Изградбата на новиот резвоарот за вода во Брусничката населба е во завршна фаза. Новиот резервоар претставува крупна инвестиција што јавното претпријатие “Водовод” ја реализира со поддршка од Општината Битола со финансиски средства обезбедни со кредит од КФВ банката
„Ова е проектот за кој што ние како општина Битола дадовме голема поддршка и ние сме гарант за кредитот на ЈКП Водовод за реализација на овој многу значаен проект со кој околу 30% од населението во средната и високата зона ќе се снабдува од овој резервоар. Вредноста е околу 2 милиони евра, така што тековно ќе се прават сите фази за реконструкција, обнова, осовременување и интервенции кои ќе значат голем квалитет и намалување на загубите на вода, изјави Д-р Владимир Талески, градоначалник на општина Битола.
Од КФВ банката постои интерес за понатамошна соработка.
„Германската Влада ја поддржува Македонија со програма за водоснабдителна инфраструктура во која што учествуваат 8 града. Во моментот проектот е во првата фаза во која што учествува и градот Битола меѓу другите и ова градилиште е финансирано од тој проект. Со оваа фаза од проектот се финансира одржливо водоснабдување во различни градови и јас се надевам дека градот Битола ќе се пријави и за втората фаза од проектот. Првата фаза од проектот е 10,8 милиони евра за тие осум града, а градот Битола од нив добива 2 милиони. Градот Битола е токму навреме, а работите брзо се спроведуваат“, изјави Анѓела Екард од германското сојузно министерство за економска соработка и развој.
Резервоарот е со волумен  од 2 илјади кубици, а со него ќе се овозможи  редовно водоснабдување на жителите од средната и високата зона во градот, како и намалување на загубите во водоснабдувањето.